വിരലടയാളം പോലെ തന്നെ ഒരാൾക്ക് അയാളുടെ മാത്രമെന്നവകാശപ്പെടാവുന്ന ഒന്നാണ് 'ചുണ്ടടയാളം' (LIP PRINTS). ഒരാളുടെ ചുണ്ടിലെ ചുളിവുകളും ചുനുപ്പുകളും കുഴികളും ചേർന്ന് സൃഷ്ടിക്കുന്ന ചിത്രങ്ങൾ അയാളുടെ സിഗ്നേച്ചറാണ്. വിരലടയാളം പോലെ തന്നെ അത് സ്ഥിരവുമാണ് (PERMANENT). എന്ന് വച്ചാൽ കാലം കഴിയുമ്പോൾ ഒരാളുടെ ചുണ്ടാടയാളങ്ങൾ മാറിപ്പോകുന്നില്ല. മാഞ്ഞു പോകുന്നില്ല.
ചുണ്ടടയാളങ്ങളെ പറ്റിയുള്ള ഗവേഷണശാസ്ത്രമാണ് "CHEILOSCOPY". 1932 ൽ ഫ്രാൻസിലെ ക്രിമിനോളജിസ്റ്റായിരുന്ന ലൊക്കാർഡാണ് (Edmond Locard) ചുണ്ടടയാളങ്ങളുടെ സാധ്യതകളെ കേസന്വേഷണങ്ങൾക്കുപയോഗിക്കാമെന്ന് തിരിച്ചറിയുന്നത്. 1950-ൽ ചുണ്ടുകൾ നൽകിയ തെളിവുകൾ ഒരു കേസിന് തുമ്പുണ്ടാക്കി. സംശയാസ്പദമായി കണ്ട കാറിൽ ഒരു ചുണ്ടടയാളം Synder എന്ന പോലീസുദ്യോഗസ്ഥൻ കണ്ടു. മറ്റൊരു ആക്സിഡന്റ് കേസ് കൂടി അന്വേഷിക്കുകയായിരുന്ന അദ്ദേഹത്തിന് തോന്നിയ ചെറിയൊരു സംശയമായിരുന്നു, ആ അടയാളവും പരുക്ക് പറ്റിയ സ്ത്രീയുടെ ചുണ്ടടയാളവും താരതമ്യം ചെയ്ത് നോക്കിയാലോയെന്ന്. ചെയ്തപ്പോഴോ രണ്ടും ഒന്ന് തന്നെ! അങ്ങനെ ഒരു പെണ്ണിന്റെ ചുണ്ടുകൊണ്ട് ചരിത്രത്തിൽ ആദ്യമായി ഒരു കേസിനു തുമ്പുണ്ടായി. അത് പിന്നെ ചരിത്രമായി. ശാസ്ത്രമായി. ഗവേഷണങ്ങളിലൂടെ അതൊരു ശാസ്ത്രശാഖയായി തന്നെ വളർന്നു. ജപ്പാനിലെ രണ്ടു ഫോറെൻസിക് ദന്തഡോക്ടർമാർ ആയിരുന്ന Yasuo Tsuchihashi, Kazuo Suzuki എന്നിവരായിരുന്നു ചുണ്ടടയാള ശാസ്ത്രത്തിൽ മഹത്തായ സംഭാവനകൾ നൽകിയവരിൽ പ്രമുഖർ.
ചുണ്ടുകൾ നൽകിയ തുമ്പുകൾ നിരവധി കുറ്റകൃത്യങ്ങൾ പിന്നീട് തെളിയിക്കുകയുണ്ടായി. 1986 ൽ പോളണ്ടിൽ ഒരു മിടുമിടുക്കനായ കൊള്ളക്കാരൻ യാതൊരു തുമ്പും ശേഷിപ്പിക്കാതെ കുറ്റകൃത്യം നടത്തിയതിന്റെ സന്തോഷത്തിൽ, ഉദ്ദിഷ്ടകാര്യകാര്യത്തിന് ഉപകരസ്മരണയായി അവിടെ ഉണ്ടായിരുന്ന മാതാവിന്റെ ചിത്രത്തിൽ അമർത്തി ഒരുമ്മ കൊടുത്തിട്ട് സംപ്തൃപ്തനായി മടങ്ങി. ഒരാഴ്ച കഴിഞ്ഞപ്പോൾ അയാളെ പോലീസ് പൊക്കി. ആകെയുണ്ടായിരുന്ന തെളിവ് ആ മാതാവിന്റെ ചിത്രത്തിലെ ചുണ്ടടയാളം മാത്രമായിരുന്നത്രേ! അയാൾ പിന്നെ തൂക്കിലേറ്റപ്പെട്ടൂ!
ശാസ്ത്രം പലപ്പോഴും ഒരു മൂരാച്ചിയാണ്. നമ്മൾ കാൽപ്പനികതയുടെ തേൻ പുരട്ടി, പ്രണയത്തിൽ നനഞ്ഞൊലിച്ചു നൽകുകയും നേടുകയും ചെയ്യുന്ന ഉമ്മകളെയൊക്കെ പോസ്റ്റ്മോർട്ടം ടേബിളിൽ കിടത്തി, ഇഴകീറിപ്പഠിച്ച്, ഗവേഷണങ്ങളും പരീക്ഷണങ്ങളും നടത്തുന്ന മുരടനായ മൂരാച്ചി. നമ്മൾ സ്നേഹത്തിന്റെ പ്രകടരൂപമായി കാണുന്ന ഉമ്മകളും അവയുടെ ശേഷിപ്പുകളും ശൂന്യാകാശശാസ്ത്രം പോലെ അന്തവും കുന്തവും ഇല്ലാതെ നിരവധി ഗവേഷണങ്ങൾ നടക്കുന്ന ഒരു ശാസ്ത്രശാഖ കൂടിയാണ്. ചുണ്ടുകൾ കൊണ്ട് നമ്മൾ കോറി വയ്ക്കുന്നതിൽ, എത്രതന്നെ സ്നേഹം ഒളിപ്പിച്ചു വച്ചാലും ശാസ്ത്രത്തിന്റെ കണ്ണിൽ അതൊരു ഗവേഷണസാമഗ്രിയും നിയമത്തിന്റെ കണ്ണിൽ അത് വെറും സാഹചര്യത്തെളിവുകളുമാണ്.
പക്ഷെ സാധാരണക്കാരായ, പ്രണയികളായ മനുഷ്യരെ സംബന്ധിച്ചു, ചുണ്ടുകൾ ആത്മാവിലേക്കുള്ള ജാലകങ്ങളാണ്. നന്മയുടെയും സ്നേഹത്തിന്റെയും പഞ്ചാര ഉമ്മകൾ മാത്രം പകരാനുള്ളത്. ഒരു ശാസ്ത്രത്തിനും ഏതൊരു മാപിനിയ്ക്കും നിർണ്ണയിക്കാനകാത്തത്രയും സ്നേഹം നിങ്ങളതിൽ ഒളിപ്പിച്ചു വയ്ക്കൂ. നിങ്ങളുടെ ചുണ്ടുകൾ പോലെ, നിങ്ങളുടെ ചുംബനങ്ങളും നിങ്ങളുടെ മാത്രം അടയാളപ്പെടുത്തൽ ആയിരിക്കട്ടെ..
(1.സമജാത ഇരട്ടകൾക്ക് (Identical twins) പക്ഷേ ചുണ്ടടയാളങ്ങളും ഒരുപോലെയാണ്, വിരലടയാളങ്ങൾ പോലെ വ്യത്യസ്തമല്ലാ.
2.ചുംബനങ്ങളെ പറ്റി പഠിക്കുന്ന ശാസ്ത്രശാഖയാണ്- ഫിലമറ്റോളജി)
©മനോജ് വെള്ളനാട്
